STQARRIJA MIS-SEGRETARJAT PARLAMENTARI GĦALL-ISPORT, IR-RIKREAZZJONI U L-GĦAQDIET VOLONTARJI

Gvern għan-nies – Il-gvern permezz ta’ SportMalta jgħaddi 1,338 metru kwadru ta’ art fiż-Żona Industrijali ta’ Kordin lill-Hibernians Basketball Club biex tiġi żviluppata f’padiljun tal-basketball ġdid

Is-Segretarju Parlamentari għall-Isport, ir-Rikreazzjoni u l-Għaqdiet Volontarji Clifton Grima indirizza konferenza tal-aħbarijiet fejn ħabbar li, wara numru ta’ snin ta’ stennija, il-gvern permezz ta’ SportMalta għadda art fiż-Żona Industrijali ta’ Kordin, b’qies ta’ 1,338 metru kwadru u b’ċens ta’ 45 sena, sabiex tiġi żviluppata f’padiljun ġdid u faċilitajiet anċillari.

Is-Segretarju Parlamentari Clifton Grima spjega li permezz ta’ dan it-trasferiment, il-Hibernians Basketball Club se jkollu klabb sportiv kif jixraqlu u li qed ikompli juri l-impenn tal-gvern li jwettaq il-wegħdiet elettorali sportivi tiegħu. Huwa stqarr li dan il-gvern irid irawwem u jsaħħaħ il-kultura sportiva sa mill-etajiet bikrin.

“Bħala gvern, konxji li biex nagħmlu dan irridu ninvestu fil-faċilitajiet sportivi u fl-għaqdiet infushom, u dak huwa li qed nagħmlu llum. Aħna nemmnu li rridu nagħtu l-faċilitajiet u l-għajnuna sabiex il-klabbs sportivi jkunu jistgħu jkomplu jikbru u jtejbu s-servizzi tagħhom. Wara kollox, huma uliedna li jgawdu minn dan kollu. Dan il-gvern huwa mpenjat biex jinvesti sabiex flimkien nagħmlu l-qabża ta’ kwalità li jmiss. Irridu li kull dixxiplina sportiva tingħata l-opportunità li tiffjorixxi”,  sostna s-segretarju parlamentari.

Iċ-Chairman ta’ SportMalta Dr Luciano Busuttil tkellem fuq il-bżonn li aktar klabbs u assoċjazzjonijiet jieħdu l-inizjattiva biex jikbru u jidħlu għall-isfidi kif għamel il-Hibernians Basketball Club. B’dan il-mod, bl-art tagħhom, aktar klabbs jistgħu jsiru aktar awtonomi u jżidu l-edukazzjoni sportiva fost it-tfal, żgħażagħ u l-komunità inġenerali.

Dan il-gvern huwa mpenjat li jwettaq diversi proġetti b’risq diversi dixxiplini sportivi differenti, filwaqt li jinċentiva lill-għaqdiet iqumu fuq saqajhom u jissaħħu, u jagħti lill-atleti l-ispazju kollu biex jiżviluppaw it-talenti tagħhom lejn l-eċċellenza sportiva.